Afternoon tea我食過好多,好多大小酒店都同一啲品牌合作推出一啲精緻嘅high tea我都食唔少,當中有驚喜,中伏亦唔少,我經常都講賣相精緻同好食係兩回事,不過今次向大家極力推介呢個下午茶真係好值得去㗎!

香港文華東方酒店同Rare by Oulton合作,喺酒店大堂推出古董下午茶,為慶祝呢次合作,酒店糕點總廚Yves Matthey特別設計咗三層下午茶配合今次古董主題。

酒店糕點總廚Yves Matthey為呢次古董主題特別設計嘅三層下午茶。
酒店糕點總廚Yves Matthey為呢次古董主題特別設計嘅三層下午茶。

客人可於大堂內一邊欣賞由英國家具品牌Timothy Oulton嘅創辦人Tim從世界各地搜購嘅古董珍藏及家具名作,一邊品嚐以古典為主題嘅特色下午茶!呢個下午茶最特別嘅係所有餐具同展出嘅古董都可以買嘅,甚至係好矜貴、介乎廿幾至五十萬一個嘅Louis Vuitton古董行李箱都可以買㗎!

英式餐具盡是英國皇室圖案同英女皇頭像,好有氣派,全部都係可以買走㗎!
英式餐具盡是英國皇室圖案同英女皇頭像,好有氣派,全部都係可以買走㗎!

呢個下午茶另一個矜貴嘅地方就係得8張枱16個坐位,即係話每日只能招待16位客人,你話幾矜貴呢!

入到酒店大堂遠遠就見到好多LV行李箱同古董,好有氣派,LV行李箱分隔開下午茶嘅地方,坐入去俾好多LV古董行李箱包圍住,餐枱餐具都係古董,最鍾意六角形嗰張古董餐枱,真係好靚好典雅,枱面上星形花紋設計好似大衛星,仲有個放滿水晶酒樽同杯嘅酒櫃,靚到不得了!唯一失色嘅係因古董餐枱係精緻細細張,所以放食物都要就住,否則就會唔夠位擺。同時枱與枱之間空間比較窄,起身都要小心否則容易撞到隔離枱嘅食客,不過大家都非常之禮讓,影相嘅時候重互相遷就,氣氛和諧。而且樓底好高即使隔離就係正酒店大堂都唔會覺得嘈。

經過歲月洗禮嘅LV古董行李箱,多添一份珍貴。
經過歲月洗禮嘅LV古董行李箱,多添一份珍貴。

六角形嘅古董茶几好典雅, 茶几上星形圖案好似大衛星靚到不得了。
六角形嘅古董茶几好典雅, 茶几上星形圖案好似大衛星靚到不得了。

一坐底侍應就好細心講解呢個tea set嘅特色,我仲笑問點解唔做耐啲呢?佢話因為係嘗試,而且行李箱都需要在到期日交還。我等朋友其間侍應為我送上一杯暖水,餐巾都幫我摺好放好,所以話文華東方服務真係超讚呀!

有6款法國Mariage Frère名茶或咖啡可選擇,我當然係揀最愛嘅Earl Grey啦!來一口最愛嘅伯爵茶再食呢個古董嘅下午茶好夾㗎!

High tea嘅三層架有好厚鮮味貴價嘅Balik Salmon, Honey Mustard, Salmon Roe, Pumpernickel Bread 三文魚麥包、Egg Mimosa with Oscietra Caviar、鵝肝醬多士 Pâté en Croûte, Cranberry Jam,仲有Alaskan King Crab, Rye Bread, Cocktail Sauce阿拉斯加蟹三文治。全部都又精緻又好食,特別鵝肝醬多士好香好出色,淨係呢一度都已經值回餐價了。

之後侍應會親自為每位食客送上兩款熱食, "Vol-au-vent" Puff Pastry Case with Coronation Chicken,酥皮盒好香脆,另一款係Truffle Toast,夾有熱融芝士洋蔥嘅松露多士,超好食!記得要趁熱食!

Truffle Toast 同 "Vol-au-vent" Puff Pastry Case with Coronation Chicken 。
Truffle Toast 同 "Vol-au-vent" Puff Pastry Case with Coronation Chicken 。

熱辣辣外脆內軟嘅傳統scone。
熱辣辣外脆內軟嘅傳統scone。

有酒香嘅Mini Sherry Trifle 。
有酒香嘅Mini Sherry Trifle 。

Balik Salmon, 阿拉斯加蟹肉三文治, 鵝肝多士同魚子醬雞蛋。
Balik Salmon, 阿拉斯加蟹肉三文治, 鵝肝多士同魚子醬雞蛋。

另外當然唔少得最出名嘅Scone啦,文華東方嘅Scone同玫瑰花果醬喺香港可以話係無敵嘅,鬆餅外脆內軟,玫瑰花果醬酸酸甜甜好香玫瑰花味,每次去玫瑰花果醬都會畀我食到一啲都唔剩!其餘甜點有Strawberry Tart, Vanilla Cream 撻身香脆呍呢嗱軟滑,Paris Brest, Hazelnut Cream 好脆好香榛子味,Mini Sherry Trifle 有酒香,Queen's Cake 黑朱古力味甘濃,仲有Tipsy Cake, Glazed Pineapple 我鍾意 Victoria Sponge Cake with Strawberry Compote,口感超鬆軟,士多啤梨醬又香又清甜,真係好好味呀!

無敵嘅玫瑰花果醬同牛油忌廉。
無敵嘅玫瑰花果醬同牛油忌廉。

朱古力味香濃嘅 Queen's Cake。
朱古力味香濃嘅 Queen's Cake。

Strawberry Tart, Vanilla Cream 同埋Paris Brest, Hazelnut Cream。
Strawberry Tart, Vanilla Cream 同埋Paris Brest, Hazelnut Cream。
 

呢個tea set份量好夠,食完好飽好滿足,每日2:30-5:00pm,供應期至2月11日。◇

米芝Gi鍾意飲飲食食,對食物質素絕對有要求, 食勻港九新界大小特色餐廳、街頭特色小食;對於市面上嘅新事物,不講論健康生活,扮靚潮流資訊佢都會留意去嘗試,有好嘢正嘢筍嘢鍾意開心share,係地道港女一名! 依家佢藉機會將愛好分享畀大家。如有好嘢正嘢想同米芝Gi分享,或者查詢及反饋,請email:micgigidjy@gmail.com